跟住落黎幾日都係返16:00, 好開心!! 今朝起身既時候發現自己戴住副眼鏡, 原來琴晚等刷牙時就瞓著左...哈哈, 仲要伸個懶腰之後張床上面D野(由於冇啦啦瞓著左, 所以冇執野)一腳晒落地下。
今日又可以返教會啦, 真係好, 因為奧運開始之後都唔夠瞓返唔到早禱。不過我地今日又遲左幾分鐘, 要坐係副堂睇轉播 (好似係補習社咁=.=)
今日講道講詩篇第一篇, 講到基督徒既生命, 雖然係因信稱義, 我地仍然需要努力遵行耶和華嘅律法才能成為有福嘅人。不從惡人的計謀, 不站罪人的道路, 不坐褻慢人的坐位。
又講到靈修生活嘅重要性, 咁樣與主親近就好似一棵樹種在溪水旁, 使我地可以結出好果子, 葉子(生命)亦不枯乾。
lunch食左完醬香牛肚河粉, 嘩D河粉好厚呀, 搞到有D似刀削麵, 食到勁飽...
去返工啦!! 唔知點解今日勁多人搭巴士(由10號線「北土城」坐到Olympic Green) 幾架車都上唔到, 最後逼左上一架。結果搭左一個站(去Olympic Green要坐兩個站)有一堆人就落左車, 話咁樣逼法太受罪啦!!
今日有4項決賽, 分別係男子自由體操, 女子跳馬, 男子鞍馬同埋女子自由體操, 中國有3個衝金點gar! 我俾分配去採訪男子賽事。
賽事6:00開始, 所以我地5點幾就去等5:30開飯啦!! 今日換左飯盒供應商呀, 唔再食叮叮飯盒啦!! 變左普通飯盒, 有新鮮食物大家都好感動!!
好多意外呀, 原本以為會羸既Marian Dragulescu (Romania)同埋頂頭大熱既Diego Hypolito (Brazil)都跌低左,中國隊既鄒凱反而發揮得好好拎到16.050 (其實佢既難度分同失手既Diego都係最高既6.7) 西班牙既Gervasio Deferr (另一個熱門) 係最後一個出場既, 果時大家都睇到好緊張!! 結果佢得15.775, 鄒凱就冷手執個熱煎堆咁壓倒西班牙同俄羅斯既選手拎到金牌。
係mixed zone大家都幾興奮, 因為中國冇啦啦有面金牌, 俄羅斯果個都係爆冷呢, 搞到我地要即刻推個翻譯入mixed zone.
Reuters個記者見到Diego個教練竟然以為佢就係Diego, 問佢「你」今日點解誤, 真係十萬個無奈...
Diego出黎既時候都仲眼濕濕, Reuters想訪問佢佢就耍手擰頭, 只係行左去Portuguese記者區
d medallist仲未出黎女子跳馬就開似啦, 我勉強望到個馬, 但睇唔到落地。見到程菲第一跳跳得好好, 睇番電視重播落地都唔錯。到第2跳時個跳都幾好咁, 不過就聽到觀眾有D oh 聲...原來佢落地跪左係到, 敗係自己既程菲跳手上真係好可惜!
鄒凱出黎既時候都係直接行去中國記者區, 冇係agency area接受訪問, 所以我都返office, 幫手打左句quote
有個33歲既德國選手表演得好好, 最後拎到銀牌令人好感動。金牌得主係北韓既Hong Un Jong, 其實佢都係抄足程菲兩跳既動作, 所以大家都覺得唔想俾佢贏咁。程菲最後都攞到銅牌。
我問D中國同學, 佢地prefer 程菲拎跳馬金, 鄒凱冇牌, 定係而家咁既賽果, 佢地都很肯定咁話想程菲拎金。
之後就到鞍馬, 又有兩個運動員跌左出黎(以前都唔覺會有人係鞍馬跌落黎, 今次比賽勁常見咁wor) 中國隊既肖欽係2007世錦賽冠軍, 我果時睇video睇到呆左, 因為佢既動作非常快同流暢。佢今日係高速旋轉時隻叉落左, 差D就落馬, 嚇死人! 好彩最後無驚無險, 不過就只得15.650分 (印象中佢一般都過16分ga ma, team's qualification 16.000, team's final 16.100) 原來佢難度分得6.4jar...
之後英國選手Louis Smith以極慢既速度咁做佢既動作, 隻腳又分開左, 點知佢有6.7嘅難度分, 真係百思不得其解佢套動作有幾難lor
最後出場既就係Croatia既Filip Ude, 佢表現得好好, 完成之後我既第一個反應係「死啦, 咁樣係金牌既表現tim」不過分數出黎, 佢係第2, 肖欽贏左呀, 我地都好開心呀!!
係mixed zone入邊都冇咩做, Louis Smith講左句幾得意既, 佢話Now that I got a medal, I'm hungry Gold. 我覺得一定會係quote of the day呀!! (central editting team每日都會選一堆quotes of the day, 非常有娛樂性)
例如琴日有個Croatian籃球員輸波之後話 "The rim is small. The ball can't get in."
一個美國swimmer話 "Right now, I need to go back home, take a long break and stay dry for a while."
返到office做我既copy taking, d中國志願者已經放棄翻英文, 佢地會直接讀中文俾我聽, 等我邊翻邊打。今日又有句「楊威都在場上頂住, 衝鋒陷陣」都唔知點翻好, 最後只係諗到 On the field of play, Yang Wei is always there to fight the first battles. 中國人講埋D野都好難翻呀!!
一邊打女子自由體操又比賽緊, 嘗試邊打邊睇, 點知又話程菲跌低左...真係好慘呀, 一晚黎兩個咁大既打擊, 完左比賽見佢背住鏡頭喊真係睇到心酸, 一路係女子團體賽程菲都能夠壓場, 到今晚竟然兩次失準...
羅馬尼亞女仔Sandra Izbasa又「意外地」贏左 (其實睇番團體賽既成績佢都幾高分) 所以我地又要推兩個翻譯入mixed zone, 今晚真係好激, 好多意外賽果呢。
程菲雖然仲眼濕濕, 但都願意接受採訪。聽D同事講, 有個外國記者透過翻譯問左D好過份既問題。佢問你既屋企因為你拎到金牌而能夠改善生活, 咁你而家拎唔到, 會有D咩影響呢? 真係超級過份!! 搞到程菲即刻burst into tears, 冇辦法再答問題就行走左啦... 原來上一round佢而家係到問li類既問題, 問肖欽有關於中國既訓練制度, 問佢而家會唔會多謝個制度, 但因為肖欽拎到金牌所以就咁冇答走左去, 冇咩大問題。不過程菲已經係強忍自己既失望, 失落去接受採訪, 竟然有D咁冷血既人問埋D咁既問題...唉...
p.s. 有個香港記者拎住一件志願者風褸入黎mixed zone, 叫左梯威幫佢簽名, 跟住發現佢完全都唔係黎採訪ga, 純粹係攞簽名, 我同另一個志願者都O晒嘴...
No comments:
Post a Comment