Lynette @ Beijing Olympics: 家庭教會

係北京既第一個主日呀, 跟左Elyse既大學同學返一間家庭教會
佢地都有百幾人, 係一間商業大廈聚會, 有3節崇拜, 我返左11點果堂
係聚會正式開始之前, 有個姐妹先帶大家練下今日會唱既詩歌, 佢地所選既詩歌有新有舊
聚會形式: 敬拜詩歌 --> 詩班獻詩 --> 預備講道詩歌 --> 講道 --> 回應詩歌 --> 擘餅 (不過應該係一個月一次咁)
同埋聚會其間都有好多禱告時間, 敬拜之後, 講道前後, 同擘餅前etc
講道都好好呀, 今日講羅馬書12章, 其中印象最深既係對第1-2節既講解

所以弟兄們、我以神的慈悲勸你們、將身體獻上、當作活祭、是聖潔的、是神所喜悅的．你們如此事奉、乃是理所當然的。不要效法這個世界．只要心意更新而變化、叫你們察驗何為神的善良、純全可喜悅的旨意。

我地最常會最自己獻上既時候就係當我地遇到難處既時候, 唔知點樣去行, 就同神講「我將自己獻俾你啦, 求你指引我既前路」, 不過我地一齊順利時就想奪回主權
同埋我地成日都去計較自己好似為神犧牲左D咩, 但係其實「將身體獻上當作活祭」只係一件「理所當然」既事去回應「神的慈悲」
牧師提到一個例子, 佢地教會某年組織聖誕詩班, 報告既弟兄就話如果有邊位弟兄姐妹願意犧牲自己既時間出黎練詩, 就過黎報名啦。之後個牧師就上台補充, 話如果你係犧牲自己既時間既話就唔好黎, 因為神唔悅納LI種事奉, 神要既乃係甘心樂意既事奉
所以第2節就提到「不要效法這個世界．只要心意更新而變化」, 我地唔可以同世界既標準去衡量屬靈既事物, 只要專心去遵行神既旨意

3-8節講到各人既恩賜都唔一樣, 我地要各按著神所賜俾我地既去互相配搭。但係如果我地唔知道自己有D咩恩賜呢? 有多人都會係咁禱告問神自己有D咩恩賜, 一直都唔肯去take up任何既事奉, 但我地如果有機會事奉既話就應該事奉, 睇下自己有冇LI方面既恩賜。然後再從兩方面印證一下, 自己內面既感動, 同埋外在既印證 (弟兄姐妹有冇得幫助/造就)

完左之後有特別報告, 叫晒D畢業同學出去, 我都俾人推左出去, 大家唱左首詩歌祝福我地, 同埋教會送左本研讀版既聖經, 好好, 不過都好重, 唔知拎唔拎到返香港...

跟住有歡迎新朋友既lunch, 食完又分享一下。真係睇到福音既大能, 同埋每一件事發生係每一個人既身上都唔係偶然, 實在係神既安排去模造我地。

跟住就返左酒店meet番我roomate Ashley, 同埋另一個friend Ted, 出發去王府井行下
諗住坐地鐵, 點知10號線未開lor =.= 仲撞到兩個同學仔, 佢地都係想去坐地鐵。於是我地就要坐巴士轉地鐵啦。地鐵既轉線真係奇怪, 要出站走個大圈lor...其中一個行人通道仲勁多塵tim...